Kanada Sherqiy Türkistan Jem’iyitining re’isi Tuyghun Abduweli “Anatoliye islam merkizi” ning 2019-yilliq kishilik hoquqni qoghdash mukapatini tapshurup aldi. 2019-Yili 22-may, Toronto.

https://www.rfa.org/uyghur/xewerler/enwer-yaqup-05232019145635.html?encoding=arab

Melum bolushiche, 22-may küni Kanadaning Toronto shehiridiki iftarliq pa’aliyette Kanada Sherqiy Türkistan Jem’iyitining reisi Tuyghun Abduweli “Anatoliye islam merkizi” ning 2019-yilliq kishilik hoquqni qoghdash mukapatigha érishken.

Yighinda “Anatoliye islam merkizi” ning hey’et ezaliridin mustafa ependi Kanada Sherqiy Türkistan Jem’iyitining reisi Tuyghun ependining tirishchanliqliri üchün mezkur mukapatning bérilgenlikini bayan qilghan.

Mustaf ependi Tuyghun Abduweli ependi yétekchilikidiki Kanada Sherqiy Türkistan Jem’iyitining xizmetlirige baha bérip, mezkur teshkilatning Uyghur weziyitini anglitishtiki aktip pa’aliyetlirini maxtighan. U sözide Kanada Sherqiy Türkistan Jem’iyitining Uyghur musulmanlirining bügünki qiyin ehwalini Kanadagha anglitishta körsetken tirishchanliqlirigha, bolupmu jem’iyetning reisi Tuyghun Abduwelining tirishchanliqlirigha yuqiri baha bergen.

Bu munasiwet bilen Kanada Sherqiy Türkistan Jem’iyiti” ning reisi Tuyghun ependi ziyaritimizni qobul qilip, mukapatni alghandin kéyinki tesiratini bayan qildi.

“Kishilik hoquqni qoghdash mukapati” Kanadadiki diniy teshkilatlardin “Anatoliye islam merkizi” teripidin tesis qilin’ghan mukapat bolup, mezkur mukapat 20 yildin buyan her 5 yilda bir qétim tarqitilip kélinmektiken. Bu Kanadadiki Uyghurlarning tunji qétim bu mukapatqa érishishi iken.

Melum bolushiche, 22-may Kanadaning Torunto shehiridiki “Anatoliye islam merkizi” ning meschitide ötküzülgen murasimgha köp sanda Uyghurlarmu qatnashqan. Kanadadiki Uyghur pa’aliyetchiliridin abdurazaq ependi ziyaritimizni qobul qilip, mezkur mukapatning tunji qétim Uyghurlargha bérilishining ehmiyiti heqqide toxtaldi.

Abdurazaq ependi bayanida Kanada Sherqiy Türkistan Jem’iyiti qurulghandin buyan, Uyghurlar weziyitini Kanadadiki diniy teshkilatlar, kishilik hoquq teshkilatliri we Kanadadiki her sahe kishilirige yaxshi anglitilip kéliwatqanliqini tekitlidi. U yene mezkur mukapatning bu qétim Tuyghun Abduweli ependige bérilishi Kanada Sherqiy Türkistan Jem’iyitining Uyghur mesilisini anglitishtiki tirishchanliqining étirap qilinishi ikenlikini bildürdi

Yuqiriqi awaz ulinishtin programmining tepsilatini anglighaysiler.